1. Nalu udaba olundilisekileyo olwatyhilelwa *umshumayeli uHabhakuki.
2. Koda kube nini na, *Ndikhoyo,ndidanduluka ndisithi: “Nceda!”ube wena uthe cwaka?Koda kube nini na ndizibika kuwe ndisithi: “Ugonyamelo!”ube wena ungahlanguli?
3. Yini na ukuba undibonise inkohlakalo?Ngani ukuba ujongane nobugwenxa?Naku sendiphahlwe yimbubho nogonyamelo;imbambano nesidube-dube zixananazile.
4. Okwakungumthetho sekuyingxwelerha;ke bona ubulungisa abuvakali ndawo.Izikhohlakali zidobelel' amalungisa;ke bona ubulungisa buyagqwethwa.
5. “Khanizikhangele izizwe nibukele:ewe, nosuka nikhwankqiswe,kuba kuyo le mihla yenu ndiza kwenza isimanga,into eningasoze niyikholelwe noba ningade niyibaliselwe.
6. Kaloku ndiza kuvusa amaKaledi,uhlanga olugenalusini noluzizityhuthu-tyhuthu,izinto ezilityhutyha ngobubanzi balo ilizwe,zithimbe imizi engeyoyazo.
7. Hayi kambe ukoyikeka kweso sizwe!Zizinto ezenza unothanda;ewe, aphuhlisa isidima sawo.
8. Ziintw' ezimahashe ashiy' ihlosi;oyikeka ngaphezu kweengcuka zamarhatya.Iinkweli-mahashe zawo zifunz' emsini;ewe, ngabafo abaphuma ekudeni.Ziintw' ezirhiwula ngathi lukhozi,
9. zifike zizele lugonyamelo;izinto ezizilahlela mpela kwinjongo yazo,ziqokelel' intimbo ngathi yintlabathi.
10. Iikumkani ahlekisa ngazo;bona abalawuli ayabagcolodela.Ke zona iinqaba awazazele nto;enza iinduli zokuhlasela azithimbe.