12. Le tla thaba pela Jehova, Modimo wa lona, lona le bara ba lona, le baradi ba lona, le bahlanka ba lona ba batona, le ba batshehadi, le Molevi ya menyakong ya lona; hobane yena ha a na kabelo le lefa jwaloka lona.
13. Iponele, o se ke wa hlahisa ditjheso tsa hao nqalong tsohle tseo o tla di bona.
14. Empa o tla hlahisa ditjheso tsa hao nqalong eo Jehova a tla e kgetha lelokong le leng la heno, mme, teng o etse tsohle tseo ke o laelang tsona.
15. Leha ho le jwalo, kamehla ha o rata, o tla hlaba, o je nama menyakong ya motse o mong le o mong, kamoo ditshitso tseo Jehova, Modimo wa hao, a o neang tsona, di leng kateng; ya sa hlwekang le ya hlwekileng ba je nama eo, jwaloka hoja ho jewa tshephe le kgama.
16. Feela, le ke ke la ja madi; o mpe o a tshollele fatshe jwaloka metsi.
17. O ke ke wa ja menyakong ya metse ya hao karolo ya leshome ya koro ya hao, le ya veine ya hao e ntjha, le ya ole ya hao, le matsibolo a dikgomo tsa hao, le a dinku tsa hao, leha e le mahlabelo a dikano tsa hao, tseo o itlamang ka tsona, le dinyehelo tsa hao tsa boithatelo, le tse ntshwang ke matsoho a hao;
18. empa ke pela Jehova, Modimo wa hao, nqalong eo Jehova, Modimo wa hao, a tla e kgetha, o tla ja tseo, wena, le mora wa hao, le moradi wa hao, le mohlanka wa hao e motona le e motshehadi, le Molevi ya menyakong ya hao, mme o tla nyakalla pela Jehova, Modimo wa hao, ka tsohle tseo o di ruileng ka matsoho a hao.
19. Iponele, o se ke wa lebala Molevi ka matsatsi wohle a ho phela ha hao lefatsheng la hao.
20. Etlare hobane Jehova, Modimo wa hao, a namise meedi ya hao, jwalokaha a o boleletse, leha o ka re: Ke lakatsa ho ja nama; kahobane pelo ya hao e lakaditse ho ja nama, o tle o je nama kahohle kamoo pelo ya hao e lakatsang kateng.
21. Etlare ha nqalo eo Jehova, Modimo wa hao, a tlang ho e kgetha ho bea lebitso la hae ho yona e le hole le wena, o tla hlaba dikgomo le dinku tsa hao tseo Jehova, Modimo wa hao, a o neileng tsona, o hlabe kamoo ke o laetseng kateng, mme o tla ja nama menyakong ya metse ya hao, kahohle kamoo pelo ya hao e lakatsang kateng.
22. O tla di ja jwaloka hoja ho jewa tshephe le kgama; ya sa hlwekang le ya hlwekileng ba di je.
23. Feela o iponele, o se ke wa ja madi: hobane madi ke moya; ha o na ho ja moya hammoho le nama;
24. o se ke wa a ja, empa o a tshollele fatshe jwaloka metsi.
25. O se ke wa a ja, o tle o iketle, wena, le bana ba hao kamora hao, ha o ntse o etsa se lokileng pela Jehova.
26. Empa haele dintho tseo o tla rata ho di kgethela Modimo, le tseo o tla di hlahisa hodima dikano tsa hao, o tla di nka, o ye le tsona, nqalong eo Jehova a tla e kgetha.
27. O tla hlahisa ditjheso tsa hao, nama le madi, aletareng ya Jehova, Modimo wa hao; madi a mahlabelo a hao a tla tshollelwa aletareng ya Jehova, Modimo wa hao, mme o tla ja nama ya wona.
28. Ela sedi, o utlwe ditaba tsena tsohle tseo ke o laelang tsona, o tle o iketle kamehla, wena, le bana ba hao kamora hao, ha o ntse o etsa se molemo, se lokileng pela Jehova, Modimo wa hao.
29. Etlare hobane Jehova, Modimo wa hao, a fedisa pela hao ditjhaba tseo o yang ho rua naha ya tsona, ha o se o dutse tulong tsa tsona, mme o ahile naheng ya tsona,
30. o iponele, esere mohlomong wa tshawaswa lerabeng ka ho di etsisa ha di se di fedisitswe pela hao, wa batla medimo ya tsona ka ho re: Na ditjhaba tseo di ne di sebeletsa medimo ya tsona jwang? Le nna ke rata ho etsa jwalo.