5. ‘Ua matou agasala ma ‘ua fai mea leaga ma ‘ua matou agaleaga, ‘ua fouvale fo‘i ‘ina ‘ua te‘a ‘ese ma au poloa‘iga ma au fa‘amasinoga.
6. E le‘i fa‘alogo i matou i au ‘au‘auna le ‘au perofeta, o ē na tautala mai i lou suafa i o matou tupu ma o matou ali‘i ma o matou tamā, ‘atoa fo‘i ma tagata uma o le nu‘u.
7. “Le Ali‘i e, ‘ua ‘iā te oe le amiotonu, a ‘ua ‘iā te i matou le māsiasi, pei ‘ona i ai i ona po nei, ‘ua i tagata o Iuta ma ē sa nonofo i Ierusalema ma Isaraelu uma, o ē ‘ua latalata mai, ‘atoa ma ē ‘ua mamao i nu‘u uma na e tulia ai i latou, ‘ona o a latou agasala na latou agasala ai ‘iā te oe.
8. Le Ali‘i e, ‘ua ‘iā te i matou le māsiasi, o matou tupu ma o matou ali‘i, ‘atoa ma o matou tamā, auā ‘ua matou agasala ‘iā te oe.
9. O lo‘o i le Ali‘i, lo matou Atua, le alofa mutimutivale ma le fa‘amāgaloina o sala, auā ‘ua matou fouvale ‘iā te ia.
10. E le‘i fa‘alogo fo‘i i matou i le si‘ufofoga o le ALI‘I lo matou Atua, e sāvavali i ana tulafono, na ia tu‘uina mai ‘iā i matou e ana ‘au‘auna le ‘au perofeta.
11. “O Isaraelu uma fo‘i, ‘ua latou solia au tulafono, ma ‘ua ō ‘ese, ‘ua lē fia fa‘alogo i lou si‘ufofoga; o lea ‘ua fa‘ao‘oina mai ai ‘iā te i matou le fetu‘u ma le malaia ‘ua tusia i le tulafono a Mose le ‘au‘auna a le Atua, auā ‘ua matou agasala ‘iā te ia.
12. ‘Ua ia fa‘ataunu‘u ana afioga na ia fetalai mai ‘iā te i matou, ‘atoa ma matou fa‘amasino o ē na fa‘amasino ‘iā i matou, ‘ina ‘ua ia fa‘ao‘o mai ‘iā i matou le malaia tele; auā e le‘i faia se mea i lalo o le lagi uma fa‘apei ‘ona faia i Ierusalema.
13. E pei ‘ona tusia i le tulafono a Mose, ‘ua fa‘apea lava ‘ona o‘o mai ‘iā te i matou o nei mala uma; a ‘ua matou le ‘ai‘oi atu i luma o le ALI‘I lo matou Atua, ‘ina ‘ia matou liliu ‘ese ‘iā matou agasala ma mafaufau i lou fa‘amaoni.
14. Na silasila fo‘i le ALI‘I i le malaia ma ‘ua fa‘ao‘oina mai ai lava ‘iā te i matou; auā ‘ua amiotonu le ALI‘I lo tatou Atua i ana galuega uma ‘ua ia faia; a ‘ua matou lē fa‘alogo i lona si‘ufofoga.
15. “O lenei, le Ali‘i e, lo matou Atua, o lē na ‘aumaia lou nu‘u ma le ‘a‘ao malosi a‘i le nu‘u o Aikupito, ‘ua e maua fo‘i vi‘iga e pei ‘ona fai i nei ona po; ‘ua matou agasala, ‘ua matou amio leaga.
16. Le Ali‘i e, ‘ou te ‘ai‘oi atu ‘iā te oe, ‘ona o lau amiotonu uma, ‘ia e liliu‘eseina lou to‘atama‘i ma lou to‘asā a‘i lau ‘a‘ai o Ierusalema, o lou mauga pa‘ia; auā o a matou agasala, ma amioletonu a o matou tamā ‘ua ‘avea ai Ierusalema ‘atoa ma lou nu‘u ma luma e i latou uma o ē vagavagai mai ‘iā te i matou.
17. O lenei, lo matou Atua e, ‘ia e fa‘afofoga mai i le tatalo a lau ‘au‘auna, ‘atoa ma ana fa‘atoga, ma ‘ia malamalama atu ou fofoga i lou malumalu ‘ua fa‘atafunaina, ‘ona o le Ali‘i.
18. Lo‘u Atua e, ‘ia e liliu mai ou fofoga, ma fa‘afofoga mai; ‘ia sisila mai ou fofoga, ma e silasila mai i lo matou fa‘atafunaina, ‘atoa ma le ‘a‘ai ‘ua fa‘aigoa i lou suafa; auā matou te le avatu lo matou ‘ai‘oi i ou luma ‘ona o a matou amiotonu, a o lou alofa tele.
19. Le Ali‘i e, ‘ia e fa‘afofoga mai, Le Ali‘i e, ‘ia e fa‘amāgalo mai. Le Ali‘i e, ‘ia e fa‘asagasaga mai ma e faia lava; ‘aua le fa‘atuatuai, ‘ona o lau afio lava, lo‘u Atua e, auā ‘ua igoa i lou suafa lau ‘a‘ai ma lou nu‘u.”
20. O lo‘o ‘ou tautala atu ma tatalo ma ta‘uta‘u atu a‘u agasala ma le agasala a lo‘u nu‘u o Isaraelu, o lo‘o fai fo‘i lo‘u ‘ai‘oi i luma o le ALI‘I lo‘u Atua mo le mauga pa‘ia o lo‘u Atua.
21. O lo‘o ‘ou tautala lava i le tatalo. ‘Ua pa‘i mai ‘iā te a‘u le tagata o Kaperielu, o lē na a‘u lua‘i iloa i le fa‘aaliga, o lo‘o lele fa‘ata‘alise mai i le itūlā o le taulaga afiafi.
22. Na ia a‘oa‘o mai ma ‘ua tautala mai ‘iā te a‘u, ‘ua fa‘apea mai, “Tanielu e, ‘ua a‘u sau nei e a‘oa‘o ‘iā te oe ‘e te poto ai.
23. Na amataina au fa‘atoga ‘ona o‘o mai ai lea o le poloa‘iga; i lē ‘ua ‘ou sau ai e fa‘ailoa atu ‘iā te oe, auā ‘ua alofateleina oe; o lenei, ‘ia e iloa le ‘upu ma mafaufau i le fa‘aaliga: