15. O lo‘o i le Atua le poto ma le a‘oa‘oga ma le malamalama i tulafono;o lo‘o ‘iā te ia le alofa ma le ala o amioga lelei.
16. O le mea sesē ma le pouliuli na tutupu fa‘atasi ma tagata agasala;a o ē ‘oli‘oli i amioga leaga, e tūtūmau i ai se‘ia o‘o ‘ina toeaina i latou.
17. O mea alofa a le Atua e tūtūmau i tagata amiotonu,o lana fesoasoani mai e fa‘amanuiaina ai i latou e fa‘avavau.
18. ‘Ua i ai le tasi ‘ua mau‘oa ‘ona o lona fa‘aeteete tele,i le o lenei le tofi e tauia ai o ia,
19. o lana fa‘apea ifo ‘iā te ia:“‘Ua ‘ou maua lo‘u mapusaga, a o le a ou ‘ai to‘atasi lava i a‘u mea lelei.”
20. A ‘ua lē mātau e ia e mavae atu o aso ma ‘ua lata mai le oti,‘ona tu‘ua lea e ia i ni isi o ana mea uma, ‘ae oti lava ia.
21. ‘Ia e fa‘amaoni i lau feagaiga ma ‘ia e saga manatua peama ‘ia e tausi pea i poloa‘iga ‘ua tu‘u mai ‘iā te oe, se‘ia o‘o ‘ina e toeaina.
22. ‘Aua ne‘i e tu i amioga a tagata agasala,a ‘ia e fa‘alagolago i le Atua ma ‘ia e mautū i lou lava tulaga.
23. Auā o le mea faigofie i fofoga o le Atua le fa‘a‘oloaina fa‘afuase‘i le tagata mativa.
24. O fa‘amanuiaga a le Atua e vave tauia mai ai i le tagata amiotonu,e fa‘atupuina ai lava ni ona fua i se itūlā pu‘upu‘u.
25. ‘Aua ‘e te fa‘apea ifo: “Se ā le mea ‘ou te tigāina fua ai,se ā se mea lelei ‘ou te maua mai ai?”
26. ‘Aua fo‘i ‘e te fa‘apea ifo:“‘Ua lava ‘iā te a‘u mea ‘ua ‘ou maua;se ā se leaga a o‘o mai ‘iā te a‘u?”
27. O aso ‘e te manuia ai, ‘aua ne‘i galo ‘iā te oe o mala;a o aso ‘e te puapuagātia ai, ‘aua ne‘i galo ‘iā te oe le manuia.
28. Auā o le mea faigofie i luma o le Atua, i le aso o le oti,‘ona taui atu i tagata ta‘ito‘atasi e tusa ma ana amioga.
29. O le puapuagā o le itūlā e tasi e fa‘agaloina ai o fa‘amanuiaga tetele;a i‘u fo‘i le ola, ‘ona fa‘aalia lea o galuega a le tagata.