24. ‘Ona la maliu atu lea ma ia; na mulimuli atu fo‘i ‘iā te ia le motu o tagata e to‘atele, ma latou fetaomi lava ‘iā te ia.
25. O le tasi fafine fo‘i, ‘ua ‘iā te ia le puna toto i tausaga e sefulu ma le lua,
26. e tele fo‘i mea na ia tigā ai i foma‘i e to‘atele, ‘ua uma atu ai fo‘i ana ‘oloa, ‘ae le‘i aogā lava ‘iā te ia, ‘ae peita‘i ‘ua atili ai lona ma‘i,
27. ‘ua fa‘alogo o ia ‘iā Iesu, ‘ona alu ane lea i ona tua, i totonu lava o le motu o tagata, na pa‘i ane i lona ‘ofu;
28. auā na fa‘apea o ia, “‘Āfai ‘ou te pa‘i atu tau lava o ona ‘ofu, ‘ona ‘ou mālōlō ai lea.”