4. O le mea lava lea, mauga o Isaraelu e, ‘ia ‘outou fa‘alogologo mai ai i le afioga a le Ali‘i le ATUA, ‘Ua fa‘apea ‘ona fetalai mai o le Ali‘i le ATUA i mauga ma mauga iti ma vaitafe ma vanu ma mea gaogao ‘ua fa‘atafunaina ma ‘a‘ai ‘ua tu‘ufua, ‘ua faoa ma ‘ua tauemua e i latou ‘ua totoe o nu‘u ‘ese i itū uma.
5. O le mea lea ‘ua fa‘apea ‘ona fetalai mai ai o le Ali‘i le ATUA: O le afi lava o lo‘u fuā ‘ua ‘ou fai atu ai i ē ‘ua totoe o nu‘u ‘ese, ‘atoa ma Etoma uma, o ē ‘ua ‘avea lo‘u lau‘ele‘ele e fai mo latou ma le fiafia o le loto ‘atoa ma le ‘ino‘ino o loto, ‘ina ‘ia faoa e fai ma vete.
6. O le mea lea ‘ia e vavalo atu ai i le lau‘ele‘ele o Isaraelu ma fai atu i mauga ma mauga iti ma vaitafe ma vanu, O lo‘o fa‘apea ‘ona fetalai mai o le Ali‘i le ATUA: Fa‘auta, o lo‘u fuā ma lo‘u ita tele ‘ua ‘ou tautala atu ai; auā ‘ua o‘o ‘iā te ‘outou le fa‘amasiasiga o nu‘u ‘ese.
7. O le mea lea ‘ua fa‘apea ‘ona fetalai mai ai o le Ali‘i le ATUA: ‘Ua ‘ou si‘i lo‘u lima, ‘ua fa‘apea, O nu‘u ‘ese e vagavagai ‘iā te ‘outou, e māsiasi lava i latou.
8. A o ‘outou mauga o Isaraelu e, e tutupu o ‘outou la la‘au, e fua mai fo‘i a ‘outou fua mā lo‘u nu‘u o Isaraelu; auā ‘ua latalata ‘ona latou ō mai.
9. Auā fa‘auta, ‘ou te i ai ‘iā te ‘outou, ‘ou te fa‘asaga atu fo‘i ‘iā te ‘outou, ‘ona galueaina lea ‘outou ma fa‘ato‘aina.
10. ‘Ou te fa‘auluolaina fo‘i tagata ‘iā te ‘outou, o le ‘āiga uma o Isaraelu, o lona ‘ato‘atoa lava; e ‘ainā fo‘i ‘a‘ai, e atiina a‘e fo‘i mea ‘ua fa‘atafunaina.
11. ‘Ou te fa‘auluolaina o tagata ‘atoa ma manu ‘iā te ‘outou; e uluola lava i latou ma fānanau; o a‘u e ‘aināina ai ‘outou e pei o ‘ona tuga tuai ‘iā te ‘outou, ‘ou te agalelei fo‘i ‘iā te ‘outou e sili i lo ‘outou ulua‘i ‘ainā; ‘ona ‘outou iloa ai lea o a‘u lava o le ALI‘I.
12. ‘Ou te fa‘afeoa‘iina tagata i luga ‘iā te ‘outou, o lo‘u lava nu‘u o Isaraelu; e fai oe mo latou, e fai fo‘i oe mo latou tofi, ‘e te lē toe fa‘aumatia lava tagata a‘i ‘iā te i latou.
13. ‘Ua fa‘apea ‘ona fetalai mai o le Ali‘i le ATUA: ‘Ua latou fa‘apea atu ‘iā te ‘outou, “O oe ‘ua e ‘ai tagata ma ‘ua e fa‘aumatia tagata o ou nu‘u;”
14. o le mea lea ‘e te lē toe ‘ai tagata ai lava, ‘e te lē toe fa‘aumatia fo‘i tagata a‘i ou nu‘u, o lo‘o fetalai mai ai le Ali‘i le ATUA.
15. O a‘u fo‘i e lē toe lagona ai le fa‘amasiasiga o nu‘u ‘ese, e lē toe o‘o atu lava ‘iā te oe le fa‘aluma mai o tagata, e lē toe fa‘atausuaiina fo‘i ou nu‘u, o lo‘o fetalai mai ai le Ali‘i le ATUA.
16. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
17. Le atali‘i e o le tagata, sa mau le ‘āiga o Isaraelu i lo latou lava lau‘ele‘ele, ‘ona leaga ai lea ‘iā te i latou ‘iā latou amio ma a latou mea na fai; sa tusa a latou amio i o‘u luma ma le leaga o le fafine ‘ua nofo ‘ese.
18. O le mea lea na ‘ou sasa‘a ai lo‘u ita i luga ‘iā te i latou, ‘ona o le toto na latou fa‘amaligiina i luga o le ‘ele‘ele, ‘ona o a latou tupua fo‘i na latou fa‘aleagaina ai le nu‘u.
19. Na ‘ou fa‘ata‘ape‘ape fo‘i ‘iā te i latou i nu‘u ‘ese ma fa‘asalalauina i latou i nu‘u ‘ese‘ese; na ‘ou fa‘asala fo‘i ‘iā te i latou e tusa ma o latou ala, e tusa fo‘i ma a latou mea na fai.
20. ‘Ua latou o‘o atu i nu‘u ‘ese, na latou o i ai, ‘ona ta‘uvaleina ai lea o lo‘u igoa pa‘ia ‘ona o i latou, ‘ina ‘ua fa‘apea ane ‘iā te i latou, “O le nu‘u lea o le ALI‘I, ‘ua latou ō mai nai lona lau‘ele‘ele.”
21. ‘Ae peita‘i na ‘ou alofa ‘ona o lo‘u igoa, pa‘ia, o lē na ta‘uvaleina e le ‘āiga o Isaraelu i nu‘u ‘ese na latou o i ai.