16. ‘Ona alu ai lea o Opetaia e fa‘afetaia‘i ‘iā Aapo, ma ta‘u atu ai ‘iā te ia; ‘ona sau ai lea o Aapo e fa‘afetaia‘i ‘iā Elia.
17. ‘Ua iloa atu e Aapo ‘iā Elia, ‘ona fai atu lea o Aapo ‘iā te ia, “O oe ‘ea o lē fa‘atigā ‘iā Isaraelu?”
18. ‘Ona tali mai lea o ia, “E lē o a‘u lē fa‘atigā ‘iā Isaraelu, a o oe ma le ‘āiga o lou tamā; auā ‘ua ‘outou tu‘ua o poloa‘iga a le ALI‘I ma ‘outou mulimuli atu ‘iā Paala.
19. O lenei, ‘inā fe‘au atu ia ma fa‘apotopoto mai ‘iā te a‘u i le mauga o Karamelu o Isaraelu uma ma perofeta a Paala e fa selau ma le lima o sefulu ma perofeta a Asaira e fa selau, o ē ‘a‘ai i le laulau a Iesepela.”