1. Dixit ergo Achitophel ad Absalom : Eligam mihi duodecim millia virorum, et consurgens persequar David hac nocte.
2. Et irruens super eum (quippe qui lassus est, et solutis manibus), percutiam eum : cumque fugerit omnis populus qui cum eo est, percutiam regem desolatum.
3. Et reducam universum populum, quomodo unus homo reverti solet : unum enim virum tu quæris : et omnis populus erit in pace.
4. Placuitque sermo ejus Absalom, et cunctis majoribus natu Israël.
5. Ait autem Absalom : Vocate Chusai Arachiten, et audiamus quid etiam ipse dicat.