6. Uperire oime sabado ára ambuepe avei Jae oiké pe tûpâope ja oporomboe ja oi upepe peteî cuimbae ipo iyacatuapegua iyŷpíva.
7. Ja oime umi escriva iñarandú reíva ja umi fariseo jaecueranteséva omaña jese jicuai yajecha omojesâipa pe sabado areté árape, oyuju potávo omoî vaí jaguâ Ichupe.
8. Jae voí oicuaa pe jiâva ichupecuera ja jei pe cuimbae ipo iyŷpívape: Epuâ ja eñemboŷ mbytepe cuera. Ja opuâ voi jae ja oñemboŷ.
9. Upei catu Jesús jei ichupecuera: Taporandúmi peême ¿iyápa ñandeve co sabado areté árape yayapo pôrâ terâpa yayapo vaí, ñamojesâi jecove terâpa ñambuai jecove?
10. Ja Jae omaê opavave reje oyerecuevo ja jei pe cuimbaepe: Eipysonte nde po. Ja oyapo voí upeicha ja jesâi yeby ipo.
11. Ja ipochŷpa umi ambuecue cuera ja oñemongueta oñondive mbaépa oyapo vaerâ Jesu reje.
12. Uperamo umi ára rupi ojo peteî árape mombyry pe itáatŷrape oñemboe jaguâ. Ja pe pyjare pucu cue yave oñemboe Tûpâ Ñandeyárape.
13. Ja coêma ramo ojenôi jemimboe cuerape ja oiporavó doce iyapytegui cuera ja ombojéra ichupecuera avei Apostoles jembiyocuairâ.
14. Umiva catu pe Simon (ombojéra yoa avei Pedro) ja tybyra Andres, Santiago ja Juan ja Felipe ja Bartolomé,
15. ja Mateo ja Tomas ja Santiago, Alfeo raŷ, ja Simon jérava avei Celador,
16. ja Judás, Santiago ryby, ja Judás Iscariote pe iyapyjyucájarâ.
17. Ja Jae ogueyŷ jendivecuera ja opyta peteî ñu pôtíme, ja oico upepe avei jemimboecuera atŷra ja jeta umi ybypóra ou vaecue opa Judea gui ja Jerusalem gui, ja Tiro ja Sidon retâ pe ŷguasu coty guivo, ou vaecue ojendu jaguâ Ichupe ja oñemo jesâiucá jaguâ imbaasy gui cuera.
18. Ja oime ambuecue avei oñemuanguecói vaecue mbaepochy vaí gui ja oñemojesâi avei umia.
19. Ja opa umi ybypóra oñejaâ opoco Jese, osêjareje Ichugui mbae ipuacáva omojesâi vaerâ opávape.
20. Uperire Jae omaê ja oyesarecó umi jemimboe cuera reje ja jei ichupecuera: Pende reco marangatu vaerâ peêcuera pende poriaju pene tyreŷva, pene mbaerâ voínte pe teco marangatu yvapegua rejegua.
21. Pende reco marangatu vaerâ peêcuera coanga pene ñembyajyiva, peê voi peñemo jyvâtâ vaerâ. Pende reco marangatu vaerâ peêcuera coanga peyajeóva, peê voi pende rorŷ vaerâ.
22. Pende reco marangatú vaerâ umi carai cuera pene ñamotareŷ reí ramo ja pende peá reí ramo iyapytegui cuera ja pene momârâ reí ramo, ja omboí rei ramo pende réra ivaívaicha co Caraí Raŷ rejegua járeje peê.